Jörðin Dalland í Mosfellsbæ er í um 15 km fjarlægð frá Reykjavík. Árið 1975 fluttu þau Gunnar B.Dungal og Þórdís Alda Sigurðardóttir að Dallandi og hafa allt frá árinu 1977 stundað þar hrossarækt. Ræktunin fór hægt af stað, eða úr einu til tveimur fæddum folöldum á ári, í um tíu til tólf á ári . (2008 ).

Lýsa frá Efri Rotum undir Eyjafjöllum og Vaka frá Dýrfinnustöðum í Skagafirði voru fyrstu aðkeyptu hryssurnar sem notaðar voru. Margar af þeim hryssum sem nú eru í Dallandsræktuninni eru út frá þessum tveimur hryssum. Síðar voru keyptar þær Gróska frá Sveini Guðmundsyni á Sauðárkróki, Von frá Kristni Guðnasyni í Skarði, Rjóð frá Sigurjóni Jónassyni, Syðra Skörðugili og Katarína frá Kirkjubæjarbúinu. Ýmsar aðrar hryssur koma við sögu í ræktununni og má þar helst nefna Hátíð frá Dallandi sem er undan Sýslu frá Dallandi en Sýsla var í eigu hjónanna Bjargar Ríkharðsdóttur og Péturs Þorsteinssonar sem áttu og bjuggu áður í Dallandi . Hugmynd (1.verðlaun fyrir hæfileika) gaf Björn Runólfsson heitinn, frá Hofsstöðum í Skagafirði búinu . Hugmynd er nú í folaldseignum.

Í janúar 2008 er önnur og þriðja kynslóð Dallandshryssna í folaldseignum en af ræktunarhryssunum eru nú fallnar frá þær; Lýsa, Gróska,Vaka, Dagrún, Stór- Stjarna, Lukka, Harpa  og Kórund.

16 fyrstu verðlauna hryssur hafa fæðst, alist upp og verið tamdar í Dallandi / Dal.

Auk þess voru 2 keyptar sem folöld, þær Von og Katarína sem einnig eru fyrstu verðlauna hryssur.

Árið 2007 fengu 2 hryssur úr ræktununni fyrstu verðlaun á kynbótasýningum erlendis og

Dúkkulísa frá Dallandi hlaut heiðursverðlaun á Landsmóti hestamanna árið 2006.

Alltaf hefur verið lögð mikil áhersla á notkun úrvals stóðhesta sem valdir eru fyrir hverja einstaka hryssu með tilliti til ganghæfileika, byggingar og geðslags.

Dalland auk nærliggjandi Búrfellslands, sem tilheyrir búinu, telur um 400 hektara lands og hefur mikil uppgræðsla átt sér stað á þessum jörðum um árabil. Margar tegundir trjáa hafa verið gróðursettar í tugþúsundatali um landareignina, bæði til skjóls og yndisauka. Jörðin er fjölbreytileg, allt frá fellshlíðum og þýfðum mýrum niður í gróin beitarhólf sem eru víða umlukin trjábeltum sem veita hrossunum gott skjól. Má segja að jörðin sé tilvalin bæði unghrossum sem þurfa á frelsi og hreyfingu að halda og þjálfunarhrossum sem auðvelt er að nálgast í beitarhólfum nálægt hesthúsunum .

Útigangshross, þar á meðal folaldsmerar, eru höfð skammt frá hesthúsum á vetrum svo gott sé að fylgjast með stóðinu. Í slæmum veðrum komast þau öll undir þak í útihúsum.

Venjan hefur verið; ræktun, uppeldi, tamning, og síðan er ákvörðun tekin hvert stefnt er með hrossið.